नयाँ वर्ष

बैशाख २०८२

महेश मास्के

घामको प्रथम किरणसँगै
नव वर्ष
सबभन्दा पहिले तिमी त्यहाँ जानू
जहाँ मनहरू थाकेका छन्
जाडो यामभरि पत्र पत्र हिउँ झैँ जमेका निराशाहरूले
जहाँ आस्थाको छानु ढाकेका छन्
भित्र कतै संघर्षको जोश कठ्याग्रीएको होला
राम्रोसंग हेर्नू कतै अठोटले हरेस खाएको होला
अर्थ नपाएर उद्देश्यले बाटो विराएको छ कि ?
तिमी एकछिन बस्नू त्यहाँ र
मनहरूका सुख दुःखका कुरा सुनिदिन्
एकछिन सेक्न सकून् तिम्रो न्यानोमा
आस्था र जोशहरूले
आफ्ना चिसिएका हात खुट्टाहरू
अठोटले देख्न सकोस्
वसन्तको उमंग समेटेर भर्खरै टुसाउँदै गरेका पालुवाहरू
र उद्देश्यलाई सम्झाउनू परिवर्तनको निरन्तरतासंग जुडेको जीवनको अर्थ !

अन्धकारको हैकम अझै जारी नै छ यो बस्तीमा
त्यसैले
विहानी पखको संदेश लिएर नव वर्ष,
सबभन्दा पहिले तिमी त्यहाँ जानू
जहाँ मनहरू थाकेका छन् ।

( ‘भोकका कैदीहरू’ कविता सङ्ग्रहबाट साभार। )

Author

महेश मास्के

पेशाले चिकित्सा र जनस्वास्थ्य अनुसन्धानकर्ता डा. महेश मास्के अस्मिता पत्रिकाको संस्थापनकालदेखि नै यससँग आबद्ध हुनुहुन्छ । विद्यार्थीकालदेखि वामपन्थी आन्दोलनमा सक्रिय रहँदै आउनुभएका साहित्यमा अभिरुचि राख्ने उहाँ पारिजात स्मृति केन्द्रका पूर्व अध्यक्ष तथा २०१२ देखि २०१६ सम्म चीनका लागि नेपालको राजदूत पनि रहनुभएको छ । अमेरिकाको बोस्टन विश्वविद्यालयबाट डाक्टर अफ साइन्स डिग्री हासिल गर्नुभएका मास्के सोही विद्यालयको Distinguished Alumni Award बाट सम्मानित हुनुभएको छ ।

View all posts