आमाबाटै सुरु भएको हो, सृष्टिमा सहयात्रा ।उनैले चिनाएकी हुन् सन्तानलाई बाबु ।आफ्ना सन्तानका बाबुलाई आफुसँगै बास दिएर परिवारको परिकल्पना गर्ने आमाहरू सहनशील मात्र होइनन्, सहअस्तित्व तिनको मूल प्रवृत्ति हो । करुणा र सद्भावको आत्मीय सूत्रमा बाँधेर आमाहरूले समाजको निर्माणमा योगदान दिए । आफ्नो परिचयलाई परिवारमा समाहित गरे । ती सबै सबैका निम्ति सम्मानपूर्वक पाउनुपर्ने कुरा त आमाहरूले पाएनन् नै, तिनका स्वाभिमान बन्दक बनाएर उनैले बनाएको समाजमा उनको अस्तित्व समाप्त गर्ने षडयन्त्रभित्र भने परिरहे।बेनाम बनाएर आमाहरूलाई पितृसत्ताले दिएको अथाह उत्पीडनप्रति, त्यसका विरुद्धमा  आजका सचेत छोरीहरूका मनमा प्रश्न उठेर नै अस्मिताले महिला हकहितका निम्ति प्रतिरोधको बहसलाई उज्यालोमा ल्याएको थियो । बहसको यही निरन्तरतास्वरूप आमाप्रति सम्बोधित चार कविताहरू अस्मिता हाम्रोको यस अनलाइन प्रवेशाङ्कमा साभार गरिएको हो ।